Pieri Pinčan
 

Gjviano di uno volto

Comune di Rigolato

‘Amôr cence foncj e cence cunfins pa propie cjere, grande volontât di tegni peât a strent il pisjin da storie di îr cul glamuç da vite di voi’; poucjas paraulas par piturâ in curt l’ultime grande fadie di Pieri Pinçan di Gjiviane, frazion di Rigulât.

Piêri di Vau al met in taule un’âti lavôr penç, plen incolm di documents, di riferiments, di storias, di fats, di personas che tal timp a son stâts e ai son voi, encje se in pous, la vite di Gjiviane.

Las pagjinas dal libri as comencin displeant la bleon da storie, lant a lengi la toponomastiche, cjareçant las cjasas e las fadias par tirâlas su, riguardant las gueras e i muarts in guere, svualant  sôre la divisions dai boscs cui nons dai propietaris che tal timp si son dâts la volte, contant i rapuarts cun Culine di Fôr e Davùatri e po’ inmò sgarfant plui in sot tai documents par cjacarâ da glesje, da maine di Miol, da canoniche, da ‘pauso dei muarts’, dal simiteri, dai acuedots, da scuele, da latarie e das associazions.

Un vouli di riguart Piêri lu met tas fameas spiegant nons, cognons e sorenons giontant alc di plui pai çocs rivâts prime di ducj a plantâ la cjase e a dâ vite al piçul paisut da valade dal Dean.

Ma encje se piçule cheste realtât a pos contâ inmò dai siei giûcs, dai siei cjants, da sô religjon, das usanças e tradizions peadas al scori da vite a partî da nassite fintramai a pouse dal simiteri; il pinel di Piêri al cor lisêr su pa tele dal so paîs disegnant cun sigurece e cun finece encje i particolârs plui piçui metint in lûs un patrimoni di culture e di storie ch’a nol dispâr nencje un tic dongje da storie cussì clamade uficiâl.

Salvâ su pa cjarte il plui pussibil e metilu a disposizion di cui che al va a cerî las propias radîs; radîs che Piêri Pinçan al à cirût famee par famee metint l’arbul gjenealogjic di ducj i abitants di Gjiviane a partî dal 1774,  giontant la liste das fameas dal 1800 al 1900 e dal 1930 al 2000.

Ta chest libri, ch’al conte plui di dusinte pagjinas, si cjate veramenti di dut e al pant un lavôr durât a lunc tamesant documents tal Archivi Storic Arcivescovîl di Udin, ta biblioteche comunâl e dal seminari di Udin, tai archivis Pre Toni Roja di Tumieç, da canoniche di Rigulât e di Gjiviane e tas cjartas dai privâts e di famee.

Il lavôr al viout la stampe grazie a Famee Imelda e Vincenzo Venanzi, di Viterbo, propietaris di une cjase a Gjiviane.

‘Ce che ju nestis vecjus ei si son tramandâts a bocjo da pâri a fîs o da von a nevouts cumò a nol è âti pusibil meti in pratico. Nomo cul meti in scrit ce che luor ei contavo, a si po’ fâ in maniêro che dut a nol lêti pierdût.’

Cussì al scrîf Piêri Pinçan tal ‘preambol’ palesant no dome la sô passion tal ravuei la storie da memorie, ma encje la volontât di passâle as novas gjenerazions cu la sperance che chestas as cjati il gust e il plasei di urî ta chest poç.

                                                                                Celestino Vezzi 

Pieri Pinçan – Gjviano di uno vôlto – pagj. 223 – Tip. Moro Andrea   Tumieç