Usance l’agnul Gabriel, ancje jo o volarès svualâ par un lamp tun paîs de Cjargne, a Soclêf, intune sô frazion, a Mediis, e lâ tune cjase de plaçute, juste in face de glesie di sant Blâs, li di une femine di non Marie, a l’anagrafe Del Fabro, vedue di Felix Marchi, ma che la int le cognòs cul non di Marie dal Fari o, plui just, di Marie di Place. O larès a complimentâmi cun jê pai siei 90 agns ben puartâts tal spirt, tal cjâf e tal cûr, ancje se il cuarp al scomence a fâ sintî il carûl dal timp.

O larès a puartâi la benedizion dal Signôr, tal sens di dî ben di jê, de sô vite, di ce che e à fat pal so om, une colone dal autonomisim furlan, e ancje par nô, tune sorte di maternitât spirtuâl. I disarès ancje jo: «Il Signôr ti à a grât». Pe tô bielece esteriôr, restade intate e forsit ancjemò plui ingjentilide cu la maiestât dai agns; pe tô bielece interiôr, che ti à compagnade in dute la tô vite, pe tô sensibilitât straordenarie, pe tô umiltât gjenuine, pe cussience vive che tu âs savût mantignî dal to jessi femine e femine cjargnele, de tô semplicitât che ti à permetût di vivi in ambients plui grancj di te, framieç de mafie culturâl o economiche udinese, cence pierdi la tô dignitât. Femine fuarte, libare, inteligjente, curiose di dut ma no peteçone, tacade a la veretât e a la fede ma no sotane o preote, gjentîl cun ducj ma regjine.

Fevelâ di Marie di Place al vûl dî tornâ a vierzi il libri straordenari de sô vite dongje di un om straordenari e duncje dificil, Felix Marchi, anarchic a 18 karats, che si è imponude une fuarte dissipline par no dipendi di nissun e che al à metût dut il so timp, il so afiet, il so cjâf, il so fiât a pro di un popul, di une culture e di une lenghe che no jere la sô, di estrazion veneto-udinese, ma che le veve scuvierte dal 1930 intun lûc insperât, tune strade di Pechin.

Lui, che nol voleve berdeis di famee, leams di feminis, responsabilitâts di fruts, al à peade e consacrade la sô vite a une sdrume di fîs di anime e al à scombatût cun passion, cun inteligjence, cun rabie par che a passassin de sotanance a la funzion di atôrs e protagoniscj. Un Friûl cressût, un Friûl sfrancjât des tantis peandis sociâls e psicologjichis, un Friûl a l’altece des sôs grandis cualitâts e in grât di tratâ a pâr cun chei altris popui. Chest sium, cheste idee, cheste utopie si è concretizade te criure dal mês di fevrâr dal 1946, tun Friûl martoriât par vie di une vuere stupide e cruente, cu la int cjamade dai fastidis plui banâi e tragjics dal pan e gaban. E lui, dutune cuntun altri grant, pre Bepo Marchet, al à dât vite a di chel “sfuej setemanâl indipendent” passât a la storie come “Patrie dal Friûl”. Al costave 10 francs, la cjarte, ma al costave une vite. In chel part dolorôs ma esaltant, pal moment politic e economic, Marie e à fat di co-mari. Se si cjale il fat che la redazion e la ministrazion a jerin in borc di Prampar 10, prime di passâ tal borc de Pueste, vadì vie Vittorio Venit 32, si capìs che Marie si è cjatade la cjase invadude di sfueis, libris, pacs, conts curints, e che e veve il so dafâ a tignî une cjase dignitose cun doi inteletuâi scjaldinôs, cjapâts te lôr dialetiche e indiferents a dut ce che al sucedeve ator di lôr.

Cheste femine vignude des monts, cun grande culture e sintiment ma cence titui, si è cjatade a contat cu la creme dai inteletuâi e dai oms libars de sô ete, plens di titui e di ideis. E jê, che forsit e jere partide come lavorent, si è cjatade a fâ la part di femine di cjase, par dâur ai ospits no dome une cjicare di cafè, ma ancje un fregul di calôr e di umantiât. Si è cjatade, cence volê ma no cence merit, a mediâ, a morestâ, a umanizâ chei çurviei splendits che a riscjavin di jessi teorics, come ducj i inteletuâi cence fastidis di famee. No ai cjatade la sô firme tai articui de Patrie, ma siguramentri e à incidût fuart la sô esperience, il so ecuilibri, la sô cotidinianitât. Parcè che, se si à di fâ une Patrie, si à di fâle par int normâl, vadì oms, feminis e fruts, e no par professôrs o avocats. Marie e à puartade la sô feminilitât tun ambient di maschilisim esasperât. E à puartât la sô concretece fra oms che le cjatavin pronte e che no vevin mai vût fastidis ni par comprâsi la bocjade ni par dâle dongje. In chês gnots eternis di discussions, la sô stesse presince discrete ma reâl ju obleave a sbassâ la vôs e a domâ il convulç.

Ma l’apuart di Marie di Place pe Patrie nol è stât dome di furnî cafès e pagnuts o di peâ pacs di gjornâi e spedîju ogni setemane (a son rivâts a 13 mil copiis!!!). Si è ancje impegnade in prime persone firmant il gjornâl come diretôr responsabil par un timp unevore lunc: 10 agns. O cjatìn la sô firme, in sostituzion di Lelo Cjanton, tal numar 5-6 dal 1953 e l’ultime le cjatìn tal numar di dicembar dal 1963, cuant che il gjornâl al à finide la sô periodicitât e al à scugnût rindisi a l’omologazion democristiane e a l’insensibilitât de çampe, che no volevin savênt di autonomie tal sens vêr di Marchi, Marchet, Pasolini e di ducj i spirts plui preparâts e libars.

Finide la sô mission politiche e culturâl e cul om ch’al sint simpri di plui il pês dai agns e des lotis imparis ch’al à scugnût frontâ, Marie e torne te sô splendide tiere cjargnele e ancje Felix al fronte l’ultime part de sô vite lungje e tormentade. Agns di pâs e di serenitât, lontans dal batibui e dai berdeis de politiche, di visitis gradidis di amîs de prime ore. La stagjon de vendeme. Cuntune ponte di disilusion par no vê cjatât te int chê brame di libertât, chê voie di riscat, chê dignitât che si varès vût dirit di spietâsi cumò che lis robis a scomençavin a lâ benut e che la palanche no mancjave. Un gjenitôr al patìs simpri par un fi che nol marce pe strade drete, ancje se, in cussience, al à cirût di fâ dut il pussibil. In cheste pâs velade di malincunie al rive il taramot dal 1976, po la profugance tes barachis al inizi dal paîs, po la ricostruzion e la jentrade te cjase paterne. Marie, tant plui zovine dal so om, si è trasformade in mari e lui, che nol veve pôre nancje dal gjaul, si poie daprûf di jê come un frut. Come ch’al jere di spietâsal, ancje il vecjo rôl al cole, cjamât di agns e di duliis.

Marie e reste sole, cu l’arcje dai siei ricuarts e cul so om che le cjale dal grant ritrat picjât tal mûr. La frute e je deventade femine e la femine e je deventade viele, ma simpri restant frute. Cumò e finìs 90 agns. Ce podìno fâi plui di ringraciâle cun dut il cûr, di venerâle come une mari, di onorâle cirint di vivi cun chê virtût e fuarce e dignitât che lôr a àn insegnât cul penâl e soredut cu la vite? La grande famee de Patrie i sta dongje cul afiet e la preiere. Che la sô vite, tai agns che i restin, e veti i colôrs inimitabii dai boscs cjargnei inte sierade. Che e sedi contente dal tant che e à fat. Ch’e puedi vê la furtune, jê che no à vude une famee materiâl, di jessi circondade di une sdrume di fîs che a cjaminin contents e motivâts viers la libertât. Che Diu ti benedissi cu la rosade dal cîl e cu la bondance de tiere e che il to cûr al vedi pâs.