Il Bambin di Cresburg

    Cresburg, un sît da l'Austrie, al è l'unic paîs dal mont cristian dulà che lis cjampanis a sùnin il glorie de nassite dal Redentôr cinc minûts dopo la miezegnot. E viveve duncje a Cresburg une vecjute unevore in là cui agns di non Margarete. Une sere, e jere propit chê dai 24 di dicembar, e jentrà dibòt la Muart te sô cjasute: e jere passade a traviers la puarte sierade cence fâ un fregul di rumôr. Margarete ch'e stave gugjant e alçà i vôi: - "Ése zà ore?" - j domandà cul cûr in man. "E je ore!" - j rispuindè la Muart.

    "Spiete inmò un fregul, ti prei - e suplicà la vecjute - o ài di finî cheste mae di lane".

    "Cetant timp ti covential?"

    Grete j dè une svoglade al lavôr e po a stimis, j rispuindè: "Dôs oris. Dôs oris a mì mi bastin."

    "Al è masse di spietâ".

    "Ma jo o ài premure di finî la mae. Ogni an 'ndi fâs une pal Frutìn ch'al nàs, se jo no rivi a finîle, il Bambin al varà frêt. No sintistu ce criure?"

    "Dôs oris di ritart tal ubidî a la leç di Diu - j rispuindè con fâ sevêr la Muart - a vùlin dî doicent agns di pene di scontâ denant di jentrâ te pâs  eterne di Diu".

    La vecjute e strabalçà di pôre. Po dopo scjassant il cjâf : Nol impuarte nuje - e rispuindè - il Bambin al patirès cence mae. Doicent agns? Pazienze!" e lè cussì indenant a gugjâ biel svuelte intant che la Muart la stave spietant tun cjanton.                        

    A mancjavin pôs minûts a la miezegnot cuanche Grete e alçà i vôi: "O soi pronte" - j disè a la Muart. Insieme a làrin fûr e s'inviàrin bielplanc une dongje chê âtre, sot il cîl fodrât di stelis. Troc troc e faseve la falç batìnt su lis alis crotis de Muart. Sul stradon arborât, a scugnìrin fermâsi. Incurnisât tun arc di lûs blancjone al vignive indenant il Bambin ch'al lave a Betlem. La vecjute si metè in genoglon e co j fo dongje j dè umilmentri la mae.

    Gjesù Bambin si fermà e al butà il vôli su la Muart ch'e spietave lì ret e al domandà: "Indulà làiso?"

    "A scontâ doicent agns di penis par jentrâ te felicitât eterne" - j rispuindè la vecjute.

    Il Bambin  alore voltansi viers la Muart: "Va vie di culì, cheste la compagni jo." E cjapade pe man Grete, al tornâ indaûr cun jê pal troi larc ch'al puartave in Paradîs. Rivâts lassù, e jere in pont la miezegnot e cinc minûts: il Nadâl di Cresburg.

(da une liende austriache)

Il fantulìn al è nassût