"Trei dîs"

Line a ere aì, sul balcon da cjamare, ch’a cjalave cence un fîl di atenzion atorn di se.

Il pinsîr al coreve une vôre lontan e nol cjatave poste, ansit simpri di plui j roseave tal so jessi metinle intune particolâr condizion che, se da une bande j puartave tante contentece, di chê âte la faseve bassilâ no pouc.

Trei dîs! Erin bielgià passâts trei dîs di ritart e jei no saveve ce cjarte giuâ. J sameave di sintîsi cambiade, i ultims timps encje il so spirit nol ere chel di simpri, fintramai cjalansi tal spieili a jodeve che la sô mûse, biele e frescje, a stave mudant. O almancul j pareve a jei!

A cirive cun dute la fuarce di no pensâ, ma al ere plui fuart di jei e chest balìn in ogni moment e in ogni ocasion al scoreve davant i vôi da sô anime cuâsi a volei tignîle simpri in àngulas.

Ogni tant si presentave tanche une roube no ben definide lontane lontane cuâsi une bugade di arie ch’a cjarece e s’in va; âtas voltas inveze ere come une montane che dut a mene vie e j parave da bande ducj chei àitis pinsîrs e problemas.

La cuestion ere aì cence une soluzion imediade, ma cun conseguensas che jei a no vares mai crodût.

            L’ere già da cuâsi un an ch’a veve conossût chel giovin, si cjatàvin dispes, ai stavin ben insieme, si niçulavin tal cjamp dai sintiments, il mont l’ere dut aì tas lôrs mans, il cîl al ere l’unic testemoni di un amôr ch’al si stave simpri plui madressint, nissun saveve da lôr storie ne amîs, ne parantâts.

Ma cumò erin passâts trei dîs!

Renzo, cussì al si clamave, al lavorave in bancje al ere di famèe cence problemas finanziaris e al veve cjatât la pueme intune sâgre paesane dulà che la musiche a grant volum di un disc jockey volant ju veve obleâts a fâsi dongje par rivâ a sintîsi.

No si erin mai jodûts prime encje pal fat che noi stavin tal stes paîs.

            Nol è che subit si fos impiade une flame, ma a ere nassude une amicizie che plan planin si ere tramudade intun’âti sintiment plui impegnatîf. Di chest lôr fat noi veve mai baratât paraule cun nissun, vevin cjapade la sielte di no pandilu nencje ai lôr amîs plui fidâts e nol ere facil rivâ a tegni platât il dut encje cuant ch’ai lave atorn insieme.

            Si tratave di une sorte di giûc da lôr inventât par rindi plui fuart e tal stes timp plui biel il lôr rapuart; lu volevin dome par lôr cuâsi che cualchidun al podès in cualchi maniere rompi il lôr mateç.

La lôr gioventût, ch’a veve passât i vincj agns, ju faseve passonâ tal cjamp da fantasie fasint jodi il mont colôr di rôse cence rindisi simpri cont das dificultâts che la vite a presente a ogni etât.

Il son dal telefòn a svê Line dal so çavareâ, j met il cûr sot sôre e il poc tas gjambas e tun marilamp a si bute a cjapâ la cuarnete pojade tun taulin da sale.

“Pront? I sei Line!”

“E jo i sei tô mâri! Viout ch’i rivìn plui tart e no vignìn a cene!”

“Va ben, mame! Mandi!” Line a pôe jù il telefon deludude di no vei sintût la vous ch’a sperave.

Si sente ta poltrone, a impìe cul comant a distance la radio e a cjape tas mans un gjornâl da lei.

A rive a stâ daûr as primas rias e dopo tal cjâf al torne a roseâj chel càncar di pinsîr.

E se lui nol mi vûl? A son trei dîs! E s’a nol vûl lâ indavant? Ce fasaràjo jo? Spietìn inmò doman e dopo cjaparìn provediments!

            A cirive, tal so jessi, di dâsi une cualchi rispueste par meti il cûr in pâs e la cussience a tasei, ma dut al ere dibant. No rivave a capî indulà ch’a veve sbalgjât, a tornave cul ricuart a riviodi ducj i moments, ma no gjavave fûr nue di bon o miôr nue ch’a podes dâj il confuart e la fuarce di rivâ a parâ inbande chel grant fastidi.

            E pûr une soluzion a scuignive jessi. Tocjave di frontâ il probleme a cuatri mans cence poure di rimeti alc; a ere ore di sclarî une volte par dutas la cuestion encje se l’êsit al sares stât negatîf.

No podeve âti vivi in chestas condizions cu la poure continue di un alc ch’al veve da sucedi.

Plui facil a dîsi che a fâlu!

            Il so caratar simpri viert e alegri al veve cjapât une plê di malinconie che simpri plui a si faseve strade, a ere come un cavalîr che ta sô fan disperade al fâs fûr dute la fôe dal morâr lassant dome il telâr. E chel telâr al ere, in cualchi maniere, il grant scrussi di Line ch’a si viodeve dibot simpri plui bessole ta sô lote.

            Chê da Peònas la gafe tal so grim tant che a cjavàrie cui siei pinsîrs e un biel sum al cjape la vente as pouras dal vivi. Une figure biele, riçote, ridint a cjape vite davant di se e jei la cjarece, la busse, la strenç; j cjacàre a lunc cence otegni rispueste. Tal sum Line a gjolt di chescj moments ch’a no vorès âti bandonâ. Un marilamp!

            E il sum al cambie vele: a è simpri jei l’atôr maestri ch’a cor cence poste intun bosc fis di peçs! Tancj son i sterps e i baraçs che si cjate davant, ma il so pont di riferiment al è chel di rivâ a cjapâ che ombre riciote che j scjampe fûr di man e ch’a giûe a cicerîsi enfre i peçs.

            Il so desideri di fermâle, di strengile, di bussâle j met las svualas tai pîs, ma il destin e la nature a samèin volei fermâ in ogni forme e cun ogni mieç la pueme in corse.

            No mole distes la sô ilusions e cul flât a grops a cor, a cole, a jove, a slungje las mans, ma intun biel moment cuant ch’a j samê di podei strengi tas mans il so obietîf dut si sfante tune gneule di fumate.

            Line si svê di colp strassameade, dute sot sudôr e cul cûr che j bat da mat.

S’incuarç di vei pisulât une dade e si met il cûr in pâs contente di jessisi dome insumiade. Il cjâf però nol dismèntie il sum che jei subit a cale ta realtât ch’a sta vivint cirint daurman di dâj une sô clâf di leture; une prime part, cence fal, pusitive a si va a sierâ tune seconde plui dificil e cun êsits no ben definîts, ansit pitost fumulâts.

“Encje i sums son cuintre di me!” a pense a vous alte Line.

            Dal aradio j rive une musiche conossude che par un moment j met alegrie e la fâs jovâ inpîs e cjantâ dutune cu la vous ch’a ven dal imprest; la pueme a torne la giovine di simpri alegre, spiritôse, graciôse e cence pinsîrs.

            Ma al si trate dome di un salustri parcè che subit finide la cjançon il marùm al torne paron; noj va nencje di mangjâ e cussì a cjape la decision di lâ daurman a ponisi tal iet. Det e fat!

“Ma parcè no mi âl fat un colp di fîl?” a si domande ravojant su las cuviertas ad ôr dai braçs e metint un cussignel inpîs daûr dal cjâf.

“Varès podût clamâ encje jo! Ma no voi cedi! L’ultime volte ch’i si sin cjatâts j ai cjacarât claramenti! J ai det encje las mês intenzions in ogni evenienze. Forsit propit par chel al à avude chê reazion! Se no à di jessi sinceritât tra doi che si vulin bon! Dopo dut i erin pûr insieme!”

            Tal so cjâf as nassevin mil e mil domandas. Nencje il lavôr noj intaressave âti. Il so pinsîr al ere dome chel e purtrop a la faseve bassilâ no pouc. No podeve lâ indavant cussì! Nol ere tal so mût di fâ!

            A scuignive cjatâ une soluzion daurman o al massim tal indoman parcè che in pous dîs a si rindeve cont che la sô vite a ere ridote a un infiern.

“Doman i fâs la prove! Ch’a vadi cemût ch’a vûl! Jo no pos vivi cun chest scrussi! Se lui nol vûl jodarìn, ch’al cjapi une decision e... che il Signôr al meti la sô man!”

            Il Signôr! Biele cheste! Da tant timp Line no veve trop traspuart viers la religjon.

No che no crodès, ma a ere une religjon vivude un pouc a sô mode. Noj plaseve une gleisie che masse voltas a si meteve cuintre la biade int par difindi ju intares dai sorestants. Si sa che cheste no è colpe da gleisie, ma dai siei ‘dipendents’, ven a jessi dai preidis, ch’ai àn a cûr dome il lôr propi intares.

Line a saveve encje che no ducj erin cussì, a saveve che nol ere just meti ducj sul stes plan bogns e triscj, ma a ere stade testemoni di un fat particolâr dulà che un preidi al si ere fat siôr su pa piel da int e cussì, par reazion, jei a si ere slontanade da gleisie uficiâl.

            E cumò, propit tun moment di sconfuart e di bisugne, j torne tal cjâf la religjon. Ce câs!

Si sintive un pouc in colpe: masse comude incuargisi dome cumò! Nol ere coret e lu saveve benon, nol ere tal so mût di fâ! Ma a jei j ere vignût dome cumò indiment encje cheste pussibilitât!

“E po' un Signôr bon, come ch’ai dìsin, nol bandone un tal moment da bisugne!” a si dîs par convincisi.

            I vegnin cussì adament las vecjas orazions; si torne a viodi frute cuant che sô mâri, tal pònile tal iet, la insegnave e j faseve dî cualchi preère.

Si piert cussì tai braçs pençs da not cence nencje sintî il guicâ dal viergisi dal puarton.

“J scuen meti un tic di vueli!” al dîs pâri Jacum entrant.

“Dopo mai che ti lu dîs!” j rispuint Pine, la femine, che subit a va indavant clamant “Line! Line!”

“Tas! Ch’a è già lade tal iet! No jostu ch’a no è ta sale!” j fâs di moto l’om.

            Il sorêli da nove zornade al entre ta cjamare di Line enfre i scûrs in frisê, ma no la cjate tal so iet par une cjalde e lisere cjarece. Da une dade a è jovade e, cence fâsi sintî, a è lade tal gabinet: a è aì sentade sul ôr da vascje ch’a cjale une piçule aste poade in face sul mobil sôre il lavandin. No sa ce cjartas trai. L’aste, il so prin tribunâl da zornade, al à già condanade; la sô colpe: chê di vei volût bon a di un giovin e di vei metût tas sôs mans il so cuarp intun moment d’amôr. La pene pa sô colpe a ere aì davant di jei ta chel bolìn che j dave la conferme dal so lunc çavareâ: a spietave un frut.

            Tal cjâf tun moment une grande confusion, dut un disordin, un grant cjalt ta mûse, il cûr che nol si bone, vôe di scjampâ, di vosâ, di platâsi, di tolsi vie... J samê di jessi tune stanze cun dut sot sôre e no savei di ce bande tacâ. Une sensazion strane di no rivâ a dâle di ca. E cumò?

            E la int? E pâri e mâri che no san nue? E Renzo? E il paîs, e i amîs, e il preidi, e... ce disaràno? Ce fàsio bessole? E Renzo ce mi dìsjal? Il cjâf al pâr sclopâ a tantas domandas e a tantas situazions che as van e si sfàntin tun marilamp. Line no si sint di jovâ, a è aì che no sa ne trai ne muardi.

“Jo mâri!” a si ripet cuâsi cence rindisi cont. “Jo mâri!”

“Frute, mi pâr che tu t’intardas voi!” j dîs sô mâri tocant pa puarte. Line a torne dal moment ta crude realtât e istintivamenti a fâs sparî la prove da sô colpe.

“Nissun à di savèi! Scuen jodi di Renzo!” a dis tra se.

“Ai finît cumò, mame!” a vôse a sô mâri che difûr a comence a vei pinsîr a sintî di colp chescj fracàs.

Pous moments e a varche il puarton di cjase pronte a lâ a dâ la biele novitât a Renzo.

            Il sorêli al sclipìs par ben l’arie e al pâr giuâ cui luncs cjavei di Line lassâts cori libars daûr la schene; un pâr di jeans, une  maute, scarpas da gjinastiche e un persacut di marcje su pa spâle.

            A baline sù e jù inbande da strade tant ch’a spiete ch’a rivi la coriere par Tomieç. A si mouf cuâsi come un pupinot cu la suste, fasint moviments e pas mecanics cence curâsi di cui ch’a incrôse; il cjâf bas, a no cjale in mûse nissun, a timbre il bilgjet e si va a sentâ dapît. No à vôe di viodi nissun, il so unic pinsîr al è di cemût presentâ la cuestion a Renzo. Ogni tant a cjale fûr dal finestrin, ma il so cjalâ si piert tal nue cence nencje rindisi cont di ce ch’a viout o ch’a si pare davant.

            La disturbe un pouc il ridi content di dôs giovinas sentadas un pâr di puescj davant di jei. Al è juste un moment ch’a si cale ta realtât e ch’a si dà une ocjade atorn; a conòs mûsas e personas, ma a cîr di fâsi piçule platansi daûr dal schenâl; no à vôe di cjacarâ cun nissun, no à timp di stâ a pensâ a di une bufule da inventâ sul moment a gjustificazion di chel so viaç.

Noj va di vei a ce fâ cun chê int simpri curiôse dai fats di chei àitis ch’ai vulin savei dut par fîl e par segn. No! Miôr fâ finte di no conossi!

            La bancje a dà ta place plui grande dal paîs, atorn atorn butegas di ogni sorte cun bielas vetrinas, il dômo, il tribunâl, il municipi: achì a s’incrôse, vie pal dì, la vite di tante int da Cjargne. Tal sôre sere dut il curîr di int al smamìs vie cul calâ penç dal not.

            Line, prime di entrâ ta cjase dai bêçs, si dà une spielade tune vetrine e si sisteme, cuntun just colput di man, i cjavei spostant miege cjavelade sul davant. Ta casse, dulà ch’al opare Renzo, a è la code e cussì encje jei si met in file cirint di jessi plui normâl pussibil in mût di no dâ tal vouli.

“Ce fastu achì po'!” j dîs cun maravê il puem, sot vous, apene ch’a rive davant dal banc.

“I ai bisugne estreme di cjacarâti. I ai roubas impuartants da dîcj!” j rispuint Line.

“Ma nol cole migo il mont! Erin pur d’acuardi di jodisi usnot!”

“Renzo! Las roubas ch’i ai di dîcj a son serias e no intint dîlas achì dulà che mil vôi mi stan cjalant! Ti spieti difûr! Par plasei no sta fâmi domandas cumò! Anìn e tu savarâs dut!” cussì disint Line a s’invìe a jesci.

Renzo al reste inçussît da straneositât da sô pueme, al sbrume su in presce chês cuatri personas in code e al domande  il permes al Diretôr di slontanâsi un moment.

            Line, cence poste, a cîr di calmâsi denti di se par no dâ l’impression di jessi agjitade e par rivâ cuindi a slargjâ cun gracie il mantîl dal so probleme, ansit dal lôr probleme.

            Si maraveave di jessisi incuarte dome cumò che il probleme nol ere âti so, ma lôr; cemût mai noj ere vignût prime tal cjâf di une simil pussibilitât che in cualchi maniere la vorès, almancul sôre vie, sliseride di une part di peis e di sens di colpe?

            La man di Renzo che la cjape par daûr tune lisere strente la puarte a realtât dal moment.

“Si pòdie savei ce cu è sucedût di tant impuartant da fâcj vignî a cirîmi sul lavôr?” j dîs Renzo alçant un pouc la vous.

“Renzo! A è sucedude une roube che forsi no veve da sucedi! Ma anìn, ti prêi, tun puest dulà che jo i podi sentâ!”

Inmò cun plui maravê Renzo j fâs strade tal piçul bar aventi dongje e ai van a sentâ tal taulìn tun cjanton avonde fûr di man e cidìn.

“Dimi, mo’! Dimi cumò! Tu sâs ch’i no ai trop timp di podèi stâ fûr!” al torne a insisti il puem no prime di vei ordenât da bevi par slontanâ la bariste.

Line a no sa di ce bande començâ! Su pa mûse i vegnin bugadas di cjalt e di freit! Il cûr j rosone tas vorêlas! A vierç la bocje, ma noj ven fûr une paraule!

“E alore?” al torne a dî il giovin.

Line si fâs fuarce e cuntun fîl di vous a dîs sbassant i vôi: “I spieti un frut!”

            Glaç tra i doi tant che Renzo al mude i colôrs da mûse e las sôs mans as fasin disegns ta l’arie cirint di judâ las paraulas che no rivin a jesci da sô bocje. Line a è aì, no si è mote dopo di chê sô veretât dete fûr cun scletece; a alce dome i vôi par incrosâ chei dal puem e podèi studiâ la prime reazion.

            Ma i vôi di Renzo ai pìrulin atorn cence poste mostrant la sô grande maravê; nol si sint par nue benon in chê particolâr situazion, al vorès jessi inant tal sportel, al si cjale atorn come un ucel entrât intune stanze ch’al cîr di jesci sbatint pas vereadas.

“Mi pâr che no tu sêtis trop content?” a gionte Line.

“Ma, no sai dîti! Dut cussì in presce, dut su doi pîs! Ma sestu propit sigure? E sèo jo di sigûr il pâri?”

A cheste tristerie dubiôse Line cun grande fermece e cirint di no alçâ la vous a rispuint:

“No pensavi ch’i tu rivas a une tâl mancjance di fiducie. Tu sâs che tu seis stât il prin a tocjâmi e tu seis stât encje l’unic. I ti ai dât il gno amôr, lu ai tignût dome par te, e cumò...”

            La man di Line a stave cjapant la corse par finî a sbati cun violence su pa taule, ma a ven fermade pouc prime da Renzo ch’al cîr di tornâ sui siei pas.

“No volevi dîti chest! Tu âs di scusâmi! Ma cemût pòdio pensâ cumò tic e tac di meti sù famèe? I ai apene començât a lavorâ, la cariere a è vierte. Jo ti voi bon, ma al è masse adore par metisi insieme dal dut. No si conossìn avonde e un frut cumò al mi cambiares ducj i progjets. No! No! Line, no podìn! Tocje di sielgi âtas stradas!” al finìs Renzo scjassant il cjâf.

            Âtas stradas! Noj sunave par nue ben a giovine cheste cjampane. Intal scori di cualchi minût Renzo al veve già cjatât une soluzion al probleme. Noj pareve vêr!

Un cantìn cence rispueste che la veve fate stâ mâl par trei dîs lui lu risolveve cussì su doi pîs; a pareve cuâsi che tra lôr doi nol fos sucedût nue.

            Un probleme cuntune soluzion elementâr: come cambiâ tune machine la gome sbusade. No saveve se ridi o vaî. No capive se il discors di Renzo al ere serio o s’a si tratave di un moment di matedât.

            La fote ch’ai stave montant sù a ere tante da no rivâ ne a movisi e tant mancul a cjacarâ. A stave aì cjalant chel giovin davant di se come se no lu conosses, come ch’al fos un sentât tal so taulìn par sbalgjo, j sameave un forest. Si! Un forest.

Âtas stradas!

“E cuâlas sarèssino ches âtas stradas?” a rive a dî Line.

“Bè! No covente ch’i ti stêti a spiegâ propit dut! Tu seis inmò al prin meis la vite no è formade, tu pos lâ tal Ospedâl, voi nol è come une volte, nissun nencje s’incuargiares! E po'! No tu seis migo la prime!” al insist Renzo cun plui sigurece cuâsi convint di veile puartade da sô bande.

“Va indavant!” j dîs Line cirint di tignî denti il plui pussibil la rabie e la vôe di vosâ.

“Al è tanche operâsi di apendicite! Une monade in dì di voi! Forsi no covente nencje ricovero! E tu seis fûr dal pinsîr! E cussì dopo si pos cjapâ la vite cun plui programazion, cun plui calme!”

            Renzo al cjacarave cuntune ande e cuntune sigurece da fâ poure. Line no lu veve mai conossût in cheste version: al sameave che il probleme nol fos so! I siei vôi noj davin da intindi nissune emozion, l’ere come ch’al fos restât tal sportel a rispuindi ai clients.

            Dulà erial finît dut l’amôr ch’al diseve di vei, dut l’afiet e la delicatece ch’al mostrave cuant ch’ai si cjatave bessoi?

            Dut smamît tal grim di un frut apene inbasdît! Une piçule sepe ch’a à apene començât a butâ fûr il prin butulut! Ma ce poure podial mai fâ un frut inmò da nassi? Vèvial tante fuarce da scuigni jessi eliminât prime di viodi la lûs dal sorêli? Cemût mai un om, o ch’al si pense un om, cjàpial poure di une creature  inmò cence fuarce, cence tristerie, cence difese, cence  vous, cence...

Domandas che s’ingrumin tal cjâf di Line ch’a cîr di capî parcès cence un parcè!

            Noj veve domandât s’a ere stade malamenti, se a veve vût cualchi maljessi, nol nomenave nencje il frut, par lui nol esisteve; l’ere come un pistrìn entrât tal vouli da netâ e parâ vie.

Une vite ch’a si stave formant sul stes plan di un pistrìn. Une vite ch’a ere denti di se tratade pieis di un scarnoç che il rivendicul al plê e al pôe da bande.

            A scuviergeve une part dal giovin che noj ere mai stade palesade prime; al veve giuât cui siei sintiments e jei j veve crodût tant da tegni la roube platade a di ducj par che nissun al ruvinas l’incjant.

E ducj i moments di tenerece passât insieme sociâts da une dimostrazion di nissune fiducie.

  La giovine si sint come une fôe colade tal paltan e balinade da ducj, cence la fuarce di une bugade di arie ch’ai des la pussibilitât di tornâ a cjapâ il svual par un puest miôr.

A vares vôe di vaî, di vosâ la sô disperazion, ma a si tratèn dome par vie da int.

“E sèo jo di sigûr il pâri?” come a dî ch’a ere stade cun ducj, come chês feminas che as vendìn il lôr cuarp pai bêçs.

            Nol veve, in dut il so discors, mai cjacarât di sintiments, di amôr, di afiet; dut l’ere passât tal tameis da cariere, dal intares, dai progjets.

            Nol veve mai cjacarât di ‘nou’, ma dome al singolâr cuâsi che dut ce cu ere stât tra di lôr no lu ves nencje vivût. Fintramai tal copâ che vite apene metude adum al veve delegât dut il fastidi a jei: tu vâs, tu fâs, tu...

            Achì a si tratave di copâ une vite, une piçule vite cence colpe, un meracul d’amôr; si baratave l’esistence di une persone tra une cjicare di cafè e un gingerino cu la semplicitât ch’a si distude une cjiche tal cinisâr.

            No! Line no podeve acetâ une tâl soluzion, nol ere tal so mût di fâ e inmò mancul ta sô cussience. A varès pitost puartât indavant il probleme bessole, no voleve rindisi colpevul di vei studât il pavêri di une cjandele apene inpiade.

            Renzo al si lasse un tic cjapâ dal gnervous a jodi che la giovine noj rispuint e a no reagjs come al solit; nol à timp da pierdi, al cjale l’orloi e par dâ un tai a cuestion al propon:

“Line, jo i conòs cualchidun tal Ospedâl, s’i tu vûs i cjacâri jo e ti fâs savèi! S’al è di pajâ alc i pensi jo! Ti vadie ben?”

            Une tâl propueste a met inmò plui rabie tal cuarp di Line che cence pensâ sôre di plui a jove di colp da cjadrê a ponte i braçs sul taulìn, al cjale Renzo tai vôi e j dîs prime biel plan e dopo alçant simpri di plui la vous:

“I pensavi di vei a ce fâ cuntun om, no cuntune machine cence anime! Tencj i tiei bêçs e las tôs conossinças!” e, cjapant il troi da puarte, a s’invie fûr vosant a dute fuarce:

“Jo i spieti un frut! No spieti la coriere o un pac da pueste! I spieti un frut! Capistu? Un frut!”

            Un cidìn cence respîr al cale tal bar, la int a cjale instupidide prime viers la pueme e po' viers Renzo che cul cjâf bas al jes dal locâl.

            Line intant, cence voltâsi, a inbrucje la vecje ferade tramudade in zone verde; a si sint vueite, no si spietave un tâl displasei, il mont j è colât intorn cun dut il so peis e jei no à la fuarce di gjavàsial vie.

            La rabie si tramude in disperazion e las primas âgrimas as segnin la sô frescje mûse provade da un marum cence foncj; si sente intune bancje tal ombrene di un peç, sfinide e madure come se las ves cjapadas.

Il sorêli al giue enfre i ramaçs puartant di tant in tant un rai di lûs tai vôi di Line pierdûts a fissâ il nue.

            Si sint tradide ta sô anime e tal so cuarp, a vorès platâsi sot cjere come un farc par no fâsi jodi da nissun, a sint sôre di se i vôi da int ch’a passe come se la pontàssin cul deit, a vorès sparî, cancelâsi da cjere, tolsi vie.

J ven tal cjâf las cjacaras e i coments da int, a cîr di scuviergi la reazion ch’a vares tai siei confronts. A torne a pensâ a propueste di Renzo; forsi nissun a savarès, ma a scuignarès rispuindi a sô cussience.

            J ven indiment i fats plui frescs contâts dai gjornâi e das televisions: Neonato ucciso e gettato nel bidone delle immondizie - Giovane donna partorisce il bambino e lo getta nel W.C. - Bambino in fasce abbandonato davanti alla porta del convento.

            Encje jei a podares jessi ta cheste liste. Cambial alc butâ un frut tas scovaças o tal bandon di une sale operatorie di un Ospedâl? Eise difarence butâ un frut pene nassût tal gabinet o dâlu in ‘past’ ai laboratoris di profums o di esperiments? Ce sìntial denti di se cui ch’al comet chestas roubas?

Ce tantas domandas, cetancj misteris, cetancj parcès!

            Une ariute frescje e lisere a dismouf la giovine dal inçussiment; “No!” a pense la pueme. “No pos bandonâ la mê creature! Ce colpe âe jei di un mont ch’al rasone mâl e ch’a nol ten cont di chei cence vous? I frontarai il probleme inta famèe, i cjatarai un lavôr, dut, fûr che trailu vie! A ‘nd’è une vite denti di me ch’a si sta formant: i vôi, la bocje, las mans, il cuarp, las gjambas, il cjâf!

Cui sa ce musute ch’al vorà, cui sa ce cjavei ch’al vorà, cui sa...

No pos cjapâmi la responsabilitât di cancelâle cheste vite nove par vei dopo par simpri il scrusi di pensâ cemût ch’al podares jessi stât.

I stoi daventant mâri, mâri! Ce grande roube! I stoi dant la vite a di un’âte persone ch’a no à domandât di vegni al mont! Ma nencje jo no ai domandât di vegni al mont! Ma se ducj varès vût di domandâ voi il mont nencje nol sarès e nencje jo!

Jo i daventarai mâri!”

torna a "Poesiis e contis"